கருகிய பருவம்

கருவேல முள்ளெடுத்து
காற்றாடி செஞ்சி வைச்சி
கண்ணார கண்டு ரசிச்சோம்
கள்ளிச்செடியில் பழம் பறிச்சி
முள்ளு நீக்கி தின்னும் போது
ரத்தம் வர நாக்கு கடிப்போம்

கழுதையின் வால் பிடிச்சி
தகர டப்பாவில் கல்லு போட்டு
காட்டுக்குள் துரத்தி அடிச்சோம்
பிஞ்சு மாங்காய் திருடிகிட்டு
ஏரிக்கரை மேட்டு மேலே
மிௗகாய் வைச்சி கடிச்சி சிலிர்த்தோம்

பூவரசன் காய்யெடுத்து
பம்பரமாய் சுற்ற விட்டு
கைகொட்டி கூவி சிரித்தோம்
ரயில் ரோட்டில் காசு வைச்சி
காந்தமாய் மாறுமென்று
கால்கடுக்க தவமிருப்போம்

கல்யாண வீட்டினிலே
கட்டி வச்ச வாழை மரத்தில்
காய் பறிக்க துரத்தப்படுவோம்
முட்டு சந்து எதுவென்றாலும்
மூணுபேரு சேர்ந்து விட்டால்
முன்னூறு கொட்டமடிப்போம்

அஞ்சு வயசு ஆன பின்னே
பள்ளிக்கூடம் போவென்ற
அப்பனையே சாபமிடுவோம்
வாத்தியாரை கண்ட பின்னே
பூச்சாண்டி கண்டது போல
அம்மாவின் பின்னால் மறைவோம்

நாலு சுவரு கட்டி
நடுவுல எழுத்தவச்சி
படியென்று கம்பை எடுத்தான்
படுபாவி வாத்தியாரு
கண்ணு ரெண்டை உருட்டி பார்த்து
நம்ம சுதந்திரத்தை கெடுத்து விட்டான்

மேலும் குருஜியின் கவிதைகள் படிக்க இங்கு செல்லவும்....>

•       நீங்கள் அமிர்த தாரா மந்திர தீட்சை எடுக்க ( Clik Here)

•       குருஜியின் மர்மம் பற்றி படிக்க இங்கு செல்லவும்